স্বপ্ন কুমারের এক গুচ্ছ কবিতা

কসম

আমি আর কোনোদিনও যাইতাম-নায় তোমারে ছাড়িয়া
আমি আর কোনোদিন যাইতাম-নায় দূরই কোনো-খানো
তোমার সকলতা-ইতো আমি নিছিগি কাড়িয়া
জানি আমার আর কোনো জায়গা নাই তোমার এই মনো

যতো দুরই আমি যাইনা কেনে ,তুমিতো জানো
ঘুরি ফিরি আমি তোমার কান্দাত্-ই আবার আই
তুমি তো জানো তুমি যে আমারে চুম্বকর মতন টানো
কও তুমি ছাড়া কেম্নে আমি আর-ঘাটর পানি খাই

আমি পিছলা-খাইয়া পড়ি রইছি খালের পাড়ো
আমি গলা পর্যন্ত ডুবি রইছি পচা পানির মাঝে

কও চাই, এখনও অমলা রাগ, তোমার-নি সাজে
আল্লার দোহাই— এব্লা আমার হাত-খান ধরো

আর টান দিয়া তুলো আমারে ডুবি যাওয়ার আগে
তোমার অবহেলা বেগম, একদম কলিজা’ত গিয়া লাগে…
.

কও — বেগম

কও চাই— কিতা এমন আমি , দিছিনা তোমারে
কও চাই—আমার আর কিতা দেওয়ার আছিলো বাকি
কও, তোমার খুশির লাগি, কিতা এমন করছেনা কুমারে
তে কেনে আমারে তুমি ,দিলায়-রেগো ফাঁকি

আমিতো আমার চোখের ঘুম তোমারে দিছিলাম
লগে দিছিলাম আমার সকল স্বপন
আমি তো আমার মুখের হাসি তোমারে দিছিলাম রে গো
আর লগে দিছিলাম —আমার যতো গোপন

আমিতো আমার কলিজা তোমার হাতে-ই—
তুলি দিছিলাম-রে সোনা
আর তোমার কাছেই জমা রাখছিলাম
আমার সকল বিশ্বাস

আমিতো তোমার নামেই—
জিকির করতাম-গো ময়না
আর তুমি না-চাইলে, কও
ভুল করিও নিছিনি আমি —একফোঁটা নিশ্বাস

কও , কিতা এমন তুমি চাইছিলায়— বেগম
আর কিতা এমন আমি—পারছিনা তোমারে দিতাম
কও , কেনে আমারে তুমি ,ঠগাইলায় শেষে
কও , কিতা-ই-বা এমন আছিলো আমার কম ?

.

তুমি ছাড়া

তুমি ছাড়া আমি আর কিচ্ছু-ই নায়
তুমি ছাড়া আমারে আর, কে কও চিনে?
বড় মাছে জানো-ইতো ছোটো মাছরে খায়
কতো সময় বাঁচে মাছ, কও জল বিনে ?

তুমি ছাড়া আমি যেনো পানি ছাড়া মাছ
তুমি ছাড়া আমি যেনো ডানা-ভাঙ্গা পাখি
তুমি ছাড়া আমি যেনো পাতা ছাড়া গাছ
তুমি ছাড়া আমি কও, কেম্নে রে গো থাকি

আমি যেন থাকি তোমার চোখের মনি হইয়া
আমি যেন থাকি তোমার ছায়ার মতন
চাইনা দুনিয়া’ত্ আমি— আর কোনো ধন
খালি, তুমি যেন না-মরো ‘বেগম’ আমারে থইয়া …

.

আও কুমার আও রে

আমারে অলা একলা থইয়া কই তুমি যাও
আমার ধারো বইয়া তুমি কার দিকে চাও

কোন গাঙ্গো গিয়া তুমি কার নৌকা বাঁও
দোহাই লাগে এব্লা কুমার ঘরো ফিরি আও

আমার ঘরের হাজমা-খানি এম্নে পচি যায়
আমার কলসির মিঠা পানি তোমার বার-চায়

আমার গাছের পাকনা ফল এম্নে ঝরি পড়ে
আমার ফুলের মধু শুকায় ভ্রমর থাকো দূরে

কেনে কুমার ইতা করো আমার কিতা দোষ
বাইরের লাগি কেনে তুমি অমলা বেহুঁশ

আও কুমার আও ফিরি দোহাই আল্লার
বোঝোনা কেনে ,কেউ একজনে তোমার বার-চার

.
কেনে রে কুমার

কেনে রে কুমার তোর অলা যায় দিন
কার কাছে আছে তোর কিতা এতো ঋণ

কেনে রে কুমার তোর মুখো হাসি নাই
কেনে রে কুমার তুই জ্বলি পুড়ি ছাই

কেনে রে কুমার তুই ভুলি দেশ খেশ
ভিন দেশো ভিন নামে ভিন তোর বেশ

কেনেরে কুমার তোর কষ্ট মনে এতো
বিনা কামে কেনে তুই ঘুরোস পথো পথো

কুমার তুই জানোস নিরে তুই কিতা চাস
কার লগে ঘর তোর আর কার লগে বাস

কেনেরে কুমার তোর সবতা মিছা
যে পে হাঁটোছ তুই কেনে উচা নিচা

যে ডালো ধরোছ তুই কেনে ভাঙ্গি পড়ে
তোর গাছো কেনে এতো পুকরা-ফল ধরে

কেনেরে কুমার তোর অলা দিন যায়
ভাটির নৌকা কে তোর উজানেদি বায়?
.